10/02/2025
ရွှေအလေးချိန် ပြောင်းလဲသတ်မှတ်သဖြင့် ရွှေဆိုင်များ အမြတ်တိုးလာဟု ရန်ကုန်ရွှေအသင်းပြော
ရန်ကုန်၊ ဖေဖော်ဝါရီ ၁၀
ရွှေ ၁ ကျပ်သား အလေးချိန်ကို ၁၆.၃၂၉၃၂၅ ဂရမ်အဖြစ် ပြောင်းလဲသတ်မှတ်လိုက်တာကြောင့် ရွှေဆိုင်များ အမြတ်တိုးလာကြောင်း ရန်ကုန်တိုင်းဒေသကြီး ရွှေလုပ်ငန်းရှင်များအသင်း (YGEA) ကနေ သိရပါတယ်။
အရင်က ရွှေ ၁ ကျပ်သား အလေးချိန် ၁၆.၆ ဂရမ်နဲ့ ၁၀ ပိဿာ ရောင်းနိုင်ရင် အခု ၁၆.၃၂၉၃၂၅ ဂရမ်နဲ့ ရောင်းပါက ၂ ပိဿာခန့် တိုးလာကြောင်း YGEA ဥက္ကဋ္ဌ ဦးမျိုးမြင့်က ငွေကြေးခဝါချမှု တိုက်ဖျက်ရေးသင်တန်းဖွင့်ပွဲမှာ ပြောကြားခဲ့ပါတယ်။
ရည်ညွှန်းဈေးသတ်မှတ်ရေးကော်မတီအနေနဲ့ ၂၀၂၄ ခုနှစ်၊ ဒီဇင်ဘာလ ၆ ရက်နေ့မှ စတင်ပြီး စံချိန်မီ ရွှေ ၁ ကျပ်သား အလေးချိန်ကို ၁၆.၆ ဂရမ်အစား ၁၆.၃၂၉၃၂၅ ဂရမ်ကို ပြောင်းလဲပြီး ရည်ညွှန်းဈေးတွေကို စတင်သတ်မှတ် ထုတ်ပြန်ခဲ့ပါတယ်။
“ရွှေတိုးမှ မြတ်တာပါ။ ဈေးတက်လို့ လိုက်တက်တယ်ဆိုတာ အမြတ်မဟုတ်ပါဘူး။ ရောင်းပြီးတာနဲ့ နောက်တစ်ခါ ပြန်ဝယ်ရင် အမြတ်မရှိတော့ဘူး။ အဲ့ဒါကြောင့် အရှုံးရှိပါတယ်”လို့ ဆိုပါတယ်။
ကောလာဟလကို အခြေခံပြီး ရွှေဈေးနှုန်းကို တဖြည်းဖြည်းနဲ့ ဆွဲတက်လာတာကြောင့် ယခုအခြေအနေမှာ တစ်ကျပ်သားကို ကျပ်သိန်း ၆၀ ကျော်အထိ ရောက်ရှိလာလို့ ဓာတ်သတ္တု (ရွှေ) ရည်ညွှန်းဈေးသတ်မှတ်ရေးကော်မတီက ထုတ်ပြန်ထားတဲ့ ဈေးနှုန်းနဲ့ ရောင်းချဖို့လည်း အသင်းဥက္ကဋ္ဌက တိုက်တွန်းထားပါတယ်။
“ကောလာဟလကြောင့် ဈေးတက်တာကို လက်မခံပါဘူး”လို့ ဦးမျိုးမြင့်က အသိပေးခဲ့ပါတယ်။
ဒီနေ့မှာ ကမ္ဘာ့ရွှေဈေးနှုန်း (Spot Gold) ဟာ တစ်အောင်စ အမေရိကန်ဒေါ်လာ ၂၈၇၆ ဈေးရှိချိန် ဓာတ်သတ္တု (ရွှေ) ရည်ညွှန်းဈေးကော်မတီက သိပ်သည်းဆ ၁၉.၂၅ ဂရမ်/ကုဗစင်တီမီတာ အထက်ရှိတဲ့ စံချိန်မီရွှေတစ်ကျပ်သားဈေး ၅,၄၈၀,၀၀၀ ကျပ် သတ်မှတ်ထုတ်ပြန်ပါတယ်။
သတင်း - BETV Business
