22/03/2023
၁။ ဓါတ်မီးကိုင်နည်း
---------------
ဓါတ်မီးကို ၄၅ ဒီဂရီ စောင်းကြည့်ပါ။ ပထမဦးစွာ ကျောက်တစ်တုံးကို ကြည့်တော့မယ်ဆိုရင် ကျောက်ကို ချက်ချင်း မီးထိုးမကြည်ပါနဲ့။ ဓါတ်မီးကို ကျောက်နဲ့ တစ်ပေလောက် ခွာပြီးတော့မှ ဓါတ်မီးထိုးကြည့်ပါ။ ယမ်း၊ မန်း၊ ချော်တွေကို ကြည့်ပါ။ ကျောက်ရဲ့ဝိတ်(အလေးချိန်)ကို လက်ဖြင့် ချိန်ဆပါ။ ကျောက်တစ်တုံးလုံးရဲ့ အကောင်းဆုံးနေရာကို အရင်ထောက်ကြည့်ပါ။ ယမ်းအလှဆုံးနေရာ၊ မန်းအလှဆုံးနေရာတွေကို တဖြည်းဖြည်းချင်း ဓါတ်မီးနဲ့ထောက်ကြည့်ပါ။ မန်းတွေ့လျှင်လည်း မန်းနေရာကို ဖြည်းဖြည်းချင်း ထောက်ကြည့်ပါ။ ကျောက်ကိုကြည့်မယ်ဆိုရင် ကျောက်တစ်တုံးလုံးကို စေ့စပ်သေချာစွာ ကြည့်ပါ။ ကြည့်နေရင်း လက်က ကျောက်ရဲ့ဝိတ်ကို ဆကြည့်ပါ။ ကျောက်တစ်လုံးရဲ့ အလေးချိန်ဟာ သာမန်ကျောက်၊ သာမန်ခဲတွေထက် အလေးချိန် စီးပါတယ်။ လက်ကလည်း ကျောက်ဟုတ်မဟုတ် ဆကြည့်ပါ။ ယမ်းနဲ့ဖွဲ့စည်းထားတာဟုတ်မဟုတ် ယမ်းကိုတွေ့အောင် သေချာရှာပါ။
ကျောက်တစ်လုံးမှာ အသားတန်းဟာ တစ်နေရာနဲ့တစ်နေရာ မတူပါ။ ဘာဖြစ်လို့လဲဆိုတော့ ယမ်းတွေ မတူတာကြောင့် ဖြစ်ပါတယ်။
ကိုယ်ကြည့်နေတဲ့ကျောက်ဟာ ကျောက်စိမ်းလည်းဟုတ်ပြီ၊ ဝိတ်လည်းစီးတယ်ဆိုရင် ဒုတိယအဆင့်နေနဲ့ မျိုးတန်းကို စဉ်းစားရမှာ ဖြစ်ပါတယ်။ မျိုးတန်းကတော့ မှော်နဲ့စပ်ဆက်နေပါတယ်။ ဘာမှော်လဲဆိုတာနဲ့ သက်ဆိုင်ပါတယ်။ မျိုးတန်းအောင်တဲ့ကျောက်လား၊ မျိုးတန်းကောင်းတဲ့ကျောက်လား၊ မျိုးတန်းညံ့တဲ့ကျောက်လား၊ မျိုးရင့်လား၊ မျိုးနုလား စသည်ဖြင့် ဝေခွဲနိုင်အောင် ကြည့်ရှုစစ်ဆေးရမှာ ဖြစ်ပါတယ်။ အဲဒီလို ကြည့်တဲ့အခါမှာ ကျောက်တွေရဲ့ မှော်သန္ဓေ ဆိုတာ အရေးပါလာပါတယ်။
ကျောက်မှာ အဆင့်သုံးဆင့်ရှိပါတယ်။ (၁) ဆေးမယ်၊ (၂) ကွမ်မယ်၊ (၃) ဖြတ်မယ်။
ကျောက်တစ်လုံးကို ဓါတ်မီးနဲ့ထောက်ကြည့်လိုက်လို့ မီးဝမ်အား(မီးပြန့်အား) ကောင်းတယ်ဆိုရင် ကျောက်ဆီကောင်းတယ်လို့ အကြမ်းဖျင်း ပြောလို့ရတယ်။ ကွမ်တဲ့အခါမှာ ကျောက်တလုံးရဲ့ ယမ်းအညက်ဆုံး နေရာကိုသာ ရွေးပြီး ကွမ်လေ့ရှိပါတယ်။ ယမ်းညက်တဲ့အတွက်ကြောင့် အသားညက်လေ့ရှိတာကြောင့် ယမ်းအညက်ဆုံးနေရာကိုသာ ရွေးပြီး ကွမ်ရခြင်း ဖြစ်ပါတယ်။ နောက်တစ်နည်းအားဖြင့် ယမ်းအလှဆုံးနေရာကို ရွေးပြီးကွမ်ထားတဲ့ ကျောက်များဟာ စျေးကွက်မှာ အဆင်ပြေလေ့ရှိတာကြောင့် ဖြစ်ပါတယ်။
ကျောက်တစ်လုံးထဲမှာ ယမ်း ဖွဲ့စည်းပုံ မတူပါ။ ယမ်း Direction(ဦးတည်ချက်) မတူညီတာမျိုးတွေ ရှိပါတယ်။ ကျောက်ရဲ့မျက်နှာပြင်အားလုံးထဲမှာမှ ယမ်း Direction အမှန်ဆုံးဘက်ကို ရွေးချယ်ပြီး၊ မီးထိုးကြည့်ခြင်း၊ ကွမ်ခြင်းများ ပြုလုပ်ရမှာ ဖြစ်ပါတယ်။
ကွမ်ထားတဲ့ကျောက်တစ်လုံးရဲ့ အသားတန်းကို အရောင်တင်လိုက်တဲ့အခါ အသားတန်းတစ်ဆင့် တက်ပါတယ်။ ဥပမာ- (၇)အဆင့်ရှိတဲ့အသားတန်းကို အရောင်တင်လိုက်တဲ့အခါ အသားတန်းအဆင့် (၈) ထိ တက်လာတဲ့သဘော ဖြစ်ပါတယ်။
အခွံကြည့်နည်း
---------------
ရေဆေးထားတဲ့ ကျောက်မှန်သမျှကို အခွံကြည့်လို့ရပါတယ်။
၁။ အခွံ
အခွံဟာ ကျောက်တစ်တုံးလုံး ညီညာနေရမယ်၊ အခွံရဲ့အရောင် ညီရမယ်။ ကျောက်မျိုးကောင်းရင် အခွံညီရပါ့မယ်။ ကျောက်မျိုးကောင်း၊ ကျောက်မျိုးတင်း၊ ကျောက်မျိုးရင့်သော ကျောက်တွေဟာ အခွံအရောင် ညီလေ့ရှိပါတယ်။ ဒါ့ကြောင့် မျိုးကောင်း၊ မျိုးတင်း၊ မျိုးရင့်သော ကျောက်တွေဟာ အခွံအရောင် ညီတယ်လို့ မှတ်ယူနိုင်ပါတယ်။ ကျောက်တစ်တုံးမှာ အရောင်အားဖြင့် (ဥပမာ ညို ဝါ မည်း စသည့်ဖြင့်) ညီညာမှုမရှိပါက လွှင့်ပစ်ရမယ့်ကျောက်များ ဖြစ်သွားနိုင်ပါတယ်။
၂။ ယမ်း
ယမ်းကိုကြည့်မယ်ဆိုရင် ယမ်းက ယမ်းလုံးလား ယမ်းပြားလား စသည်ဖြင့် ကြည့်ရပါမယ်။ ယမ်းတွေရဲ့ Direction ဘယ်လိုသွားသလဲ၊ အထိုင်ကို ဘယ်လိုထိုင်ခဲ့သလဲ ဆိုတာတွေကို တစ်ပြိုင်တက်နည်း စူးစမ်းရမှာ ဖြစ်ပါတယ်။ အထိုင်ဆိုတာ ကျောက်တစ်တုံးရဲ့ မြေကြီးထဲမှာ နေထိုင်ခဲ့တဲ့ပုံသဏ္ဍာန်ကို ဆိုလိုတာ ဖြစ်ပါတယ်။ ဒီနေရာမှာ မှော်သန္ဓေ ဆိုတာ အရေးကြီးလာပါပြီ။
တစ်ချို့ကျောက်တွေဟာ အထိုင်အောက်ကနေ အရည်အသား စီးဝင်ပြီး တစ်ချို့ကျောက်တွေကတော့ အထိုင်ရဲ့အပေါ်ကနေ အရည် အသား စီးဝင်လေ့ရှိပါတယ်။ ဒါဟာ မှော်သန္ဓေ ဖြစ်ပါတယ်။
အောက်မှော်တွေဖြစ်တဲ့ မှော်ဝမ်းကြီး၊ မှော်ဝမ်းလေး၊ မှော်ဆီဆာ၊ ဗလခ၊ တောင်ပြို၊ ရှရော်ခ၊ မန စတဲ့ အောက်မှော်ထွက်ကျောက်များဟာ အရည်အသားအားဖြင့် ကျောက်အထိုင်ရဲ့ အောက်ဖက်မှ ဝင်ရောက်နေလေ့ရှိပါတယ်။ အောက်မှော်ထွက် (မှော်ဝမ်းကြီး၊ မှော်ဝမ်းလေး၊ မှော်ဆီဆာ၊ ဗလခ၊ တောင်ပြို၊ ရှရော်ခ၊ မန စတဲ့) ကျောက်တွေဟာ ကျောက်မျိုးကောင်းလေ့ရှိပါတယ်။ ကျောက်မျိုးကောင်းရခြင်း အဓိကအကြောင်းကတော့ ကျောက်အထိုင်ရဲ့အောက်ကနေ အရည်(သို့မဟုတ်) အသား စီးဝင်းတာကြောင့်ပဲ ဖြစ်ပါတယ်။
အထိုင်ကို မျိုးတန်း လို့ ခေါ်ပါတယ်။ အထိုင်ကောင်းရင် မျိုးတန်းကောင်းပါတယ်။ ဘာကြောင့် အထိုင်ကောင်းရင် မျိုးတန်းကောင်းရသလဲဆိုတာ ကျောက်တစ်တုံးရဲ့ မြေကြီးထဲ နေထိုင်ဖြစ်တည်ခဲ့မှုကို ပြန်ကြည့်ရပါမယ်။ ကမ္ဘာမြေကြီးကိုယ်တိုင်က လှုပ်ရှားနေရတာကြောင့်ဖြစ်ပါတယ်။ ပျက်ရွေ့ကြောတွေ၊ ငလျှင်တွေကြောင့်လည်း အကြိမ်ပေါင်းများစွာ လှုပ်ရှားနေလေ့ရှိပါတယ်။ လှုပ်နေတဲ့အထဲမှာမှ ကျောက်တစ်တုံးက ဖြစ်တည်ရှင်သန်နေထိုင်ခဲ့ရခြင်းဖြစ်ပါတယ်။ ဒါ့ကြောင့် မြေကြီးထဲမှာ လှုပ်ခတ်မှုအနည်းဆုံး နေထိုင်နိုင်ခဲ့တဲ့ ကျောက်တစ်လုံးရဲ့အထိုင်ဟာ အရေးကြီးရခြင်း ဖြစ်ပါတယ်။ ကျောက်အထိုင် မငြိမ်တဲ့အခါ၊ ရွေ့လျားမှုများတဲ့အခါမျိုးမှာ ကျောက်ဆီကျောက်သား ဝင်ရောက်ဖို့အတွက် ခက်ခဲနိုင်တာကြောင့် ဖြစ်ပါတယ်။ အလူမီနီယံနဲ့ စီလီကာ ရောပြီး အသားဝင်ခြင်း ဖြစ်ပါတယ်။ အဆိုပါ အလူမီနီယံနဲ့ စီလီကာဓါတ်တွေဟာ ကျောက်တစ်တုံးထဲကို စီးဝင်ရောက်ရှိဖို့အတွက် လက်ခံရယူမယ့် ကျောက်တစ်တုံးရဲ့ တည်ငြိမ်မှုဟာ အရေးကြီးပါတယ်။ ကျောက်ဟာ ရွေ့လျားမှု အများဆုံးဖြစ်နိုင်တဲ့ အထိုင်မျိုးရှိနေပြီဆိုရင် ကျောက်ဆီကျောက်သားစီးဝင်ဖို့ ခက်ခဲနိုင်ပါတယ်။ ဒါ့ကြောင့် အထိုင်မလှတဲ့ကျောက်တွေဟာ မျိုးတန်းလျော့သွားလေ့ရှိပါတယ်။ လှုပ်ခတ်မှုများတဲ့ကျောက်တွေရဲ့အတွင်းထဲကို ကျောက်ဆီကျောက်သား ဝင်ရောက်နိုင်ခြေ အားနည်းတာကြောင့် မျိုးတန်းမရခြင်း၊ မျိုးတန်းလျှော့ခြင်း၊ ကျောက်သားမရခြင်း ဆိုပြီး ဖြစ်ပေါ်လာရပါ။
မှတ်ချက်။ ကျောက်တစ်တုံးကို ကြည့်တဲ့အခါ မြေကြီးထဲမှာ နေထိုင်ခဲ့တဲ့ပုံစံကို မှန်းဆအကဲခတ်နိုင်ရန် ဖြစ်ပါတယ်။ အထိုင်(အခေါ်)မျိုးတန်းကို မှော်သန္ဓေများနဲ့ ချ
🤡🙂🙂🙂
