08/06/2026
សហព័ន្ធសហគ្រិនគ្រឿងអលង្ការកម្ពុជា រៀបចំកិច្ចសំណេះសំណាលប្រមូលធាតុចូលសំខាន់ៗ ដើម្បីរៀបចំផែនការយុទ្ធសាស្ត្រអភិវឌ្ឍន៍វិស័យគ្រឿងអលង្ការជាតិ
(រាជធានីភ្នំពេញ)៖ នាព្រឹកថ្ងៃទី០៥ ខែមិថុនា ឆ្នាំ២០២៦ សហព័ន្ធសហគ្រិនគ្រឿងអលង្ការកម្ពុជា បានរៀបចំកិច្ចសំណេះសំណាលដ៏មានសារៈសំខាន់មួយ ក្នុងគោលបំណងប្រមូលនូវធាតុចូលឱ្យបានកាន់តែច្រើន និងគ្រប់ជ្រុងជ្រោយ ដើម្បីងាយស្រួលក្នុងការដាក់ចេញនូវផែនការយុទ្ធសាស្ត្ររបស់សហព័ន្ធឱ្យកាន់តែមានប្រសិទ្ធភាពខ្ពស់។
កម្មវិធីដ៏មហោឡារិកនេះ ត្រូវបានប្រារព្ធឡើងនៅសណ្ឋាគារលំដាប់ផ្កាយប្រាំ JD Polman ក្រោមអធិបតីភាពដ៏ខ្ពង់ខ្ពស់របស់ លោកជំទាវ ញ៉ែម មរកត រដ្ឋលេខាធិការ និងជាតំណាងដ៏ខ្ពង់ខ្ពស់របស់ លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីនៃក្រសួងកិច្ចការនារី ព្រមទាំងស្ថិតក្រោមការដឹកនាំផ្ទាល់របស់ លោកបណ្ឌិត ឆាយ ស៊ីណាត ប្រធានសហព័ន្ធសហគ្រិនគ្រឿងអលង្ការកម្ពុជា ដោយមានការអញ្ជើញចូលរួមយ៉ាងកុះករពីសំណាក់សមាជិកស្នូលរបស់សហព័ន្ធប្រមាណ ៥០ នាក់។
នៅក្នុងឱកាសនោះ សមាជិកស្នូលទាំងអស់បានរួមគ្នាយ៉ាងសកម្មក្នុងការពិភាក្សា ផ្លាស់ប្តូរមតិយោបល់ និងចែករំលែកបទពិសោធន៍ល្អៗ ដើម្បីស្វែងរកកាលានុវត្តភាព ក៏ដូចជាដោះស្រាយបញ្ហាប្រឈមនានាក្នុងវិស័យគ្រឿងអលង្ការ។ ធាតុចូលដ៏មានតម្លៃទាំងអស់នេះ នឹងក្លាយជាគ្រឹះដ៏រឹងមាំសម្រាប់សហព័ន្ធ ក្នុងការរៀបចំផែនការយុទ្ធសាស្ត្ររយៈពេលវែង ក្នុងគោលដៅលើកកម្ពស់សហគ្រិនភាព និងជំរុញវិស័យគ្រឿងអលង្ការខ្មែរឱ្យកាន់តែរីកចម្រើន និងមានការទទួលស្គាល់កាន់តែខ្លាំងនៅលើឆាកអន្តរជាតិ៕
