ہماری منزل
امامیہ اسٹوڈنٹس آرگنائزیشن پاکستان کا کارواں 22 مئی 1972ء کو سوۓ منزل روانہ ہوا اور اس مختصر سفر کی حسین و دلکش اور تعمیر آفریں یادیں لیے آج بھی یقین اعتماد اور اجتماعی شعور کے جلوس رواں دواں ہے۔ ملک کے ہر تعلیمی ادارے سے طالب علموں کی اس میں شمولیت و رفاقت اور قوم کے ہر طبقے میں اس کے پیغام کی پذیرائی نے گوہر مقصود کو قریب تر کردیا ہے۔
اس کی منزل کیا ہے؟
پیغام محمدۖ و آل محمدۖ (علیہ
م السلام) کو گھر گھر پہنچانا۔ ایک فلاحی معاشرے کی تشکیل کے لیے احیاۓ دین اسلام کی جدوجہد کرنا۔
کیونکہ
ہم اپنے شعور کی گہرائیوں سے یہ سمجھتے ہيں کہ "دین اسلام" جس کا منبع قرآن حکیم اور اسوہ اہلیبیت اطہار علیہم السلام ہے۔ یہی دنیا و آخرت کی تمام تر صداقتوں اور سلامتیوں کا منبع و مخزن اور نوع انسانی کی نجات اگر کوئی سچا ضامن ہے تو وہ اسلام ہی ہے۔
اور یہ اسی طرح ممکن ہے کہ
ہر باشعور اور درد مند مسلمان دست تعاون بڑھاۓ۔ طالب علم ذوق و شوق سے اس کارواں میں شمولیت اختیار کریں اور ہمارے ہم سفر بن جائيں۔ بزرگان ملت اپنے بچوں کو اس سفر مقدس کی جانب متوجہ کریں اور ہماری سرپرستی فرمائيں۔
لہذا آئيے کہ ہم سب مل کر
اس ظلمت شب سے برسرپیکار ہوجائيں جو دنیا میں چاروں طرف چھائی ہوئی ہے۔ یہاں تک کہ وہ صبح طلوع ہوجاۓ جب فضاۓ جہاں عدل و صداقت کی پاکیزہ کرنوں سے ہم آغوش ہوسکے۔
