01/08/2025
吳十三 之 出賣土壤系列 流浪篇 ‧ 四十
2025/08/01
呢晚我要處理嘅case，係要上去個客屋企度做，而客人係兩夫婦。
地點話近唔近，話遠唔遠，就喺沙田某公共屋邨。我喺沙田長大，絕對稱得上係地膽，隔咗咁多年，我仍然有自信恰埋眼都識行大部分地方，所以去到現場完全冇難度。
我按鐘後，開門嘅係一個年紀大我幾年嘅男人。佢望一望我，木無表情，冇講過任何一句說話就打開鐵閘畀我入嚟。
入到去有另一個女人坐咗喺度，佢應該就係call我嚟嗰位客人。「十三師傅。」
「我都唔知妳叫佢上嚟做乜……呢啲事搵外人嚟係冇用，妳真係多撚餘嘅。」
其實男人講啱咗大半。男女之間嘅事，陌生人根本幫助不大，連父母仔女都幫唔到手，何況係局外人，甚至好多時適得其反。
「不如你話點做好丫？又係你自己話想傾，但係你又乜都講唔出，又畀唔到解決方案出嚟，咁咪搵個外人嚟三口六面做公證囉！」
「……」老公啞口無言，唔識應對，皆因老婆篤正佢死穴佢應一應。
原來今次嚟係做couple爭執嘅公證……我真係上到嚟而家呢刻先知。
我指示佢哋坐喺四方枱嘅對面，而我就坐喺佢哋之間。
我我喺袋度拎副牌出嚟。「逢係客我都係咁講㗎嘞，喺我嘅占卜枱上唔講任何道德，只講可行性，清唔清楚？」
女：「就係因為知道你係咁，所以我先叫你過嚟。」
我開始洗牌，一邊發問：「你哋今次搵我嚟，係基於乜嘢問題？」
唔問由至可，一問佢哋兩個就搶韁，自話自說，不停咁同對面鬥大聲，我一句都入唔到耳，當然唔知內容係乜。
我暫停洗牌，伸出雙手，喺佢哋之間拍咗一下好響嘅掌聲，繼而大喝一聲：「停！」
佢哋兩個同時望住我，即時收聲，還好呢招係有效阻止到佢哋同時亂嚟。
「你哋搵得我嚟就要跟我嘅規矩。我指定邊個講，另一方只可以聽唔可以反駁，就算對方所講嘅資料有錯誤，之後我會畀機會另一方去辯解，咁樣得唔得先？」
「……」佢兩個不約而同點頭示意認同。
我攤開手掌，指向女方。「咁就由女方講先。」
女：「佢叫雞，搵女上房……」
第一句男方已經忍唔住反駁：「妳咪……」
我即時撳住佢。「停，畀佢講埋先，一陣先到你。」
我指住女方。「仲有冇其他嘢補充？」
「……見到佢好多上網記錄，都係叫雞同啲雞對話，由未結婚到而家咁多年，即係從頭到尾佢都呃我，明明冇錢都仲嘥埋啲咁嘅錢，冇嘞。」
我轉向指住男方：「咁而家輪到你嘞，講得。」
男：「講乜人係雞丫，妳自己咪又係出嚟約人上房！」
今次到女方忍唔住爆：「你唔係咁仆街的話我使……」
我撳住女方再講：「畀對方講晒先回應得唔得？」
女方無奈收聲。
我轉問男方：「你點知佢會做呢啲工作？」
男方暴喝：「我上房見到佢呀！」
我：「即係……你兩個喺房度碰面？」
雙方同時靜默，十幾秒後男方再補充：「我……約出嚟嗰個竟然係佢……」
我聽到佢咁講，個頭出緊煙，不期然搲咗一下眉頭，心裏彈咗一句「呢啲橋段以為做戲先會有，點知現實真係出現……」出嚟。
「乜你哋咁刺激呀……」我深吸一口氣再講：「……不如咁講啦，其實而家雙方都打和，冇話邊個啱邊個錯，只係大家喺唔適當嘅時候互相見到對方最真實最赤裸嘅一面。你哋每人各抽一張牌先，唔好開，直接畀我。」
呢啲牌其實係打算睇佢哋嘅真正想法：
男：權杖四
女：寶劍七
我自己抽一隻：
兩者之間最大公因數：The World
男方覺得只係出嚟逢場作戲，玩完就算；女方要搵自己真正想要嘅嘢，不論犧牲其他人同物。其實睇牌面，大概都睇得出呢段關係係冇得救。
我：「不如就由男方講出呢啲行為嘅原因先丫。」
男：「佢成日推三推四，上次我已經唔記得幾時，咁不如畀錢解決好過，你係男人都會明丫係咪先？我又唔係玩到唔識返屋企……」
男方講到有啲收唔到掣，所以我遞高手掌做向前推嘅動作，示意佢暫停。「得得得……我做呢個位係中立嘅，唔會對各位嘅行為畀任何評論……」點會聽唔出佢用男人立場嚟想向我拉攏丫。
「……輪到女方，到妳嘞，有冇嘢需要解釋？」
女方即時搶答：「我就係唔想同你咩，所以先間中試吓其他男人，咁既然都係做咯，咁我不如唔爭在搵啲又畀到錢我使又自願同我做嘅男人好過啦。」
男人好激動，企喺身指住女方大叫：「妳咁都講得出口嘅？妳要唔要面㗎？」
女方撟住手回應：「而家我問返你要唔要面先真呀！唔諗吓當初你係點樣呃我落嚟香港嫁你？充大頭鬼充闊佬你唔講嘅？你又唔係唔知我邊度出身，我對得住你有餘㗎！我一分一毫都係自己賺返嚟㗎，你有畀過錢我咩？仆街！」
講到呢度，成個picture自動出晒嚟。係有啲估唔到女方嘅廣東話係咁流利，基本上我聽唔出有鄉音，佢仲要識得用啲香港俚語。
「睇牌呢，基本上都對得返晒啲口供。雙方都唔認為自己有問題而改善，睇嚟女方想主動離開呢段關係，反而係男方唔想。」
女：「係呀，講明就冗啦，而家得佢一個咁婆媽嘅啫。」
男人默然。佢唔識答係好合理，論理由嚟計佢真係一個仆街。正所謂「大話怕計數」，啲證據一嘢攤晒出嚟，自然就知係邊個出問題。
「你仲有冇嘢需要補充？」
男人仍然靜默。
「老實講，我聽到呢度，已經知道今次我嚟其實無助你哋挽救呢段婚姻，尤其喺呢啲咁爛嘅局面下……」
女：「啱呀，家陣就係要畀佢認清事實。」
我再問男人：「而家女方都心意已決，你自己有冇想提出一啲新嘅做法或改善方法去挽留佢？」
男人企喺身，行咗去廚房，我以為佢裝水飲，佢唔知喺邊度拎咗把生果刀出嚟，我即時大喝：「你做乜嘢？放低先！放低再講！」，隨即拎起自己坐住嘅摺櫈做戒備。
「妳要離婚，我就死喺妳面前！」男人將刀刃放喺自己頸度。
點知，女人不慌不忙，直接行去男人面前，突然踎低擰轉半身……
我仲以為佢有嘢跌咗落地要執，點知佢就轉返身過嚟，跟住成隻手臂好似條鞭咁喺空中劃大半個圓形，兜巴就扯落男人塊面度。
呢一巴嘅響聲唔大，但係威力好大，男人成個頭斜向一邊，面容都扭曲埋，然後整個人暈低跪咗喺地，連佢揸住嗰把生果刀都飛到唔知去咗邊……我睇到呆咗。
「你真係敢死先算啦！似返個男人正正經經去搵份正經工得唔得呀？連把刀都揸唔穩，你話你咁嘅死款我仲點跟得落呀？」
男人喺半暈眩狀態下只發出幾聲「唔好咁啦……」
女人無視男人嘅挽留，拉住佢一早預備好嘅行李箱，一邊同我講：「出去外邊再畀錢你。」
我無奈跟住佢出去。離開單位時擰咗向後一望，男人仍然呆若木雞坐咗喺地下，眼神好似冇咗焦點，佢自知已經再無能力挽救。
我同女客人一齊搭升降機落樓。佢不發一言，遞咗相金畀我，跟住佢雙眼開始發紅。
「佢唔係廢柴成咁的話，都唔使走到呢步。」
「咁妳而家點打算？」
「總有辦法，有手有腳餓唔死嘅……返廣州老家先，好耐冇見阿爸阿媽。」
當時我仲喺度諗，女人咁凌厲嘅一巴會唔會打到男人三半規管破裂，甚至腦震盪，但已經唔係到我管嘅事。
呢啲case，香港好台灣好，每日總會發生喺你哋附近，仲可能有十單八單。
﹙逢一號、十一號及廿一號刊出﹚
#吳十三出賣土壤系列 #出賣土壤開懷歡暢
＿＿＿＿＿＿＿＿＿＿＿＿＿＿＿＿＿＿＿＿
好睇請俾like，課金當然制！
PayMe課金link：
https://payme.hsbc/broxiii
吳十三 - 占卜師模式 Thread
https://www.threads.net/
吳十三 塔羅占卜預約
https://www.facebook.com/VajraAccessories/posts/802864831845767
吳十三 偉特塔羅遙距課程
https://www.facebook.com/VajraAccessories/posts/2993703967588079
